Haarigi Romanze

 

Zwöi Haar uf em Kopf vom glichlige Schopf

hei zämen e Nacht näbnanger verbracht.

U wie das so isch mit benachbarte Häärli

bilde sie gli druf mitnanger es Päärli.

Sie chömme sich nächer, s isch o nid so schwär,

denn s wälzt sich dr Kopf geng im Schlaf hin und här.

 

Sie locke, oha, mit Locke sich a,

gli schwört sich das Paar, am Hüratsaltar,

bi Herrgott sim Bart u sir‘ prächtige Mähne

im Glück wie im Päch z si eis Härz u ei Strähne.

Es Haargummi dient ihne aus Ehering.

Stöppli u Fluum heissen ihri zwo Ching.

 

Vil z churz isch di Nacht, dr neu Tag erwacht.

Da Tuet, oh wie schad, am Morgen im Bad

e Strähu scho das Eheglück wieder vereitle:

Herr und Frou Haar löh sich grichtlich lah scheitle.

Es liden o d Chinger arms Stöppli u Fluum,

die hürate später im Läbe wohl chum.

 

Me gratet sich zwar itz nümen i d Haar,

doch isch’s o verbii mit dr Harmonie.

U gloubet me findt aus Verlüürer vo wahrem

Liebesglück nid mau meh Troscht bim ne Harem.

O d Paartherapie cha mit Haftgel u Spray

nüm vill usrichte gäg d Haarspalterei.

 

Itz gseht dir villicht, warum dass mis Gsicht

umgäh isch vo gar verstrublete Haar.

Nei nid, dass ig z fuul wär die Haar richtig z strähle,

cha nur Früschverliebti nid derewä quäle.

Es bricht mir ja ds Härz, weder Bürschte no Kamm

ghöre zum Morgetoiletteprogramm.

 

Ja lachet dir nur, mit euer Frisur,

s vergeit ech de scho, we dir witer so

barbirisch verfahret mit euer Behaarig

u se geng störet bir nächtliche Paarig.

Göht doch chli öfters zerzuust us em Huus,

schüsch git’s e Glatze, will d Haar stärben us.

 

Chli weniger Scheitle, chli meh Schlafgemach,

denn Nachwuchs wachst schliesslich vo sälber nid nach.

Chli weniger Scheitle, chli meh Schlafgemach,

denn Nachwuchs wachst schliesslich vo sälber nid nach.